Американскиот претседател Џо Бајден е подготвен да отстрани една од пречките за влез на Украина во НАТО, изјави за Си-Ен-Ен извор запознаен со ситуацијата.
Според изворот, Бајден би бил подготвен да го отфрли Планот за членство (МАП) за Украина, кој беше опишан во договорот од 2008 година како „следен чекор за Украина… на нивниот директен пат кон членство“. МАП, окарактеризирана како „програма на совети, помош и практична поддршка прилагодена на индивидуалните потреби на земјите кои сакаат да се приклучат на Алијансата“, е процес низ кој требаше да поминат другите нации за да се приклучат на НАТО.
Отстранувањето би било мал чекор кон олеснување на пристапот на Украина во одбранбениот сојуз. Тоа е дел од предлогот на генералниот секретар на НАТО, Јенс Столтенберг, кој беше разгледан кога двајцата лидери се сретнаа во Вашингтон претходно оваа недела.
Американскиот претседател е најмногу загрижен за изнаоѓање конкретен предлог кој би бил поддржан од другите сојузници, а кој би и сигнализирал на Украина дека се движи кон членство. Сепак, Соединетите Држави сè уште не го гледаат членството на Украина во алијансата како неизбежно поради реформите што Киев треба да ги спроведе, а изворот рече дека предлогот на Столтенберг го одразува тоа.
Предлогот на шефот на НАТО не поставува конкретна временска рамка за членството на Украина во алијансата, нешто што некои членки на Алијансата го бараа. Си-Ен-Ен претходно оваа недела објави дека САД можеби се подготвени да се откажат од јазикот околу МАП, според европски дипломат.
Украинскиот претседател Володимир Зеленски рече дека разбира оти неговата земја не може да стане членка на НАТО додека се уште е во војна.