Еднаквоста меѓу мажите и жените постои само на хартија, оцени денеска претседателот на Европскиот парламент Мартин Шулц по повод 8 Март – Меѓународниот ден на жената.
– Еднаквоста меѓу жените и мажите е суштинска вредност на ЕУ и е од клучно значење за економскиот раст, просперитет и конкурентност. Меѓутоа, денес таква еднаквост постои само на хартија, наведува Шулц во соопштението.
Жената е платена 16,2 отсто помалку од мажот на исто работно место. Жените се потешко погодени од економската криза, бидејќи стапката на невработеност кај жените е повисока од онаа кај мажите и бидејќи често имаат понесигурни работи, потсетува Шулц.
Тој предупреди дека насилството врз жените и натаму е недозволливо распространето и дека висока цена од тоа плаќаат и поединци и семејствата, но и целото општество.
Според Шулц, жените и натаму не се доволно застапени во процесот на донесување политички и економски одлуки.