Конгресот на локални и регионални власти на Советот на Европа денеска ја започна својата 31. сесија на тема „Спречување на корупцијата и промовирање на јавната етика на локално и регионално ниво“.
Како што јави дописникот на МИА од Стразбур, на оваа сесија се очекува да стане збор и за подобрување на инклузивноста и промовирањето на доброто владеење на локално ниво, како и за „несоодветно користење на административни ресурси за изборна кампања и улогата на локалните и регионалните избрани претставници“ и за „етиката и транспарентноста на локално и регионално ниво“.
Конгресот, исто така, ќе дискутираат и за неколку извештаи за состојбата на Ромите во контекст на растечкиот расизам и ксенофобијата, учеството и застапеноста на жените во локалните и регионалните власти, како и за стратегијата за борба против радикализацијата на локално ниво.
На агендата е и дебата на тема „Социјални права во Европа: имплементација на Европската социјална повелба на регионално ниво“.
Како дел од својата активност за следење на примената на Европската повелба за локална самоуправа, Конгресот ќе ги разгледа и извештаите за состојбата на локалната и регионалната демократија во Хрватска и во локалната демократија во Кипар. Пред членовите на Конгерсот ќе биде поднесен и извештај од мониторингот на локалните избори во Ерменија и Србија.
Пред Конгресот ќе се обратат министерот за внатрешни работи на Естонија, чија земја претседава со Советот на Европа, како и министерот за територијална администрација и развој на Ерменија и генералниот секретар на Советот на Европа, Торбјорн Јагланд.
Во работата на Конгресот ќе учествуваат и млади делегати на возраст од 16 до 30 години, кои заедно со членовите на ова тело активно ќе учествуваат во дебатите. Тие ќе ги презентираат проектите кои тие ги развиваат и имплементираат на теренот во рамките на иницијативата на Конгресот – „Да се подмлади политиката.”
За време на оваа сесија се очекува да бидат донесени и приоритетите Конгресот за периодот 2017-2020 година, како и обновување на делегациите и избор на нов претседател на Конгресот и на советите за регионални и за локлани власти.
Работата на Конгресот на локалните и регионалните власти на Советот на Европа ќе трае до 21 октомври.