Време е за одржување на четвртиот самит на шефови на држави и влади, на кој ќе се договорат како најдобро да се прилагодат на новата геополитичка архитектура на Европа и дополнително да ја зајакнат демократската безбедност во годините што доаѓаат, изјави генералната секретарка на Советот на Европа Марија Пејчиновиќ-Буриќ, јави дописникот на МИА.
Таа тоа го рече пред панелот на високо ниво на ПССЕ на тема „Одбрана на демократската безбедност во Европа“.
-Со текот на годините, работевме на зајакнување на заедништвото меѓу нашите земји-членки преку заеднички стандарди за човекови права, демократија и владеење на правото. Она што го постигнавме на овој начин нема еквивалент на ниту еден друг континент, потсети таа.
Сепак, според Буриќ, растот на популистичкиот и националистичкиот екстремизам претставува директна закана за нашите вредности, за мултилатерализмот и демократската безбедност. Најеклатантен пример за ова е бруталната агресија на Украина од страна на Руската Федерација.
-Сега сите сме обединети заедно со Украина, нагласи генералната секретарка на Советот на Европа.
Ова е причината поради која Советот на Европа одлучи повторно да ја отвори својата канцеларија во Киев, да го поддржи Јавното обвинителство во истрагата за грубите прекршувања.