Украински агент кој носел бомба е уапсен денес во метрото на Санкт Петербург, соопшти руската безбедносна служба (ФСБ).
Агентот наводно имал намера да постави бомба под вработен во одбранбената индустрија, објави Интерфакс.
„Импровизирана експлозивна направа маскирана како GPS тракер е пронајдена и запленета кај осомничениот. За време на испрашувањето, уапсениот објаснил дека извршил нелегални дејствија во замена за паричен надомест добиен во крипто паричник“, се вели во соопштението.
Осомничениот е 21-годишен руски државјанин кој контактирал со украинските разузнавачки служби.
Тој им обезбедил картографски и геодетски податоци добиени на неговото работно место, а исто така ги следел и персоналот во одбранбената индустрија во Санкт Петербург и Ленинградската област.