Американскиот државен секретар и министрите за надворешни работи на Франција, Германија и Велика Британија се согласија да го постават крајот на август како де факто рок за постигнување нуклеарен договор со Иран, дознава „Аксиос“.
Доколку не се постигне договор до крајот на август, ќе се активира „механизам за враќање“. Ова значи автоматско враќање на сите санкции на Советот за безбедност на ОН што беа укинати според нуклеарниот договор со Иран од 2015 година.
Американските и европските претставници го гледаат механизмот како средство за вршење притисок врз Техеран во случај дипломатските напори да не успеат. Од друга страна, Иранците тврдат дека нема правна основа за повторно воведување на санкциите и се заканија дека ќе се повлечат од Договорот за неширење на нуклеарно оружје како одговор.
Иран ќе одговори на секое повторно воведување на санкциите поради неговата нуклеарна програма, изјави портпарол на Министерството за надворешни работи во понеделник, без да прецизира какви мерки би можел да преземе Техеран.
Француски дипломатски извор минатата недела изјави за Ројтерс дека европските земји ќе мора да ги обноват санкциите на ОН врз Иран според таканаречениот „механизам за враќање“, доколку не се постигне нуклеарен договор што би ги гарантирал европските безбедносни интереси.
Споменатиот механизам се однесува на Резолуцијата 2231 на Советот за безбедност на ОН, која е дел од нуклеарниот договор од 2015 година и вклучува автоматско враќање на санкциите од претходните резолуции за Иран во случај на „значајно отстапување“ од обврските преземени од исламскиот режим во Техеран.