Сабина Селимовиќ (15), една од двете австриски тинејџерки со босанско потекло, кои во април годинава им се приклучија на џихадистите од групата Исламска држава (ИД), за еден француски весник изјави дека меѓу џихадстите и е добро и оти не сака да се врати дома.
Како што пренесуваат албанските медиуми, таа интервјуто го дала преку пораки по мобилен телефон.
– Добро се грижат за мене. Уживам во новиот живот. Имаме кечап и „нутела“. Можеме да добиеме и житарки и млеко за појадок, изјавила таа демантирајќи ја претходно објавената инфомација дека заедно со Самра Кесиновиќ (17) сакаат да се вратат дома.
Таа исто така демантирала дека е бремена.
Сепак, експертите сметаат дека размената на прашањата и одговорите се дадени во присуство на нејзиниот сопруг-џихадист и се пропаганда на исламистите по објавените информации дека Сабина сака да се врати дома.
Сабина и Самра, како што објавија на почетокот на месецов австриските медиуми, се јавиле на своите семејства и им рекле дека се бремени и сакаат да се вратат во нивните домови, бидејќи целосно се разочарале од нивниот живот во градот Рака во Сирија. Тие додале дека веќе не може да живеат како досега, но оти се плашат дека повеќе нема да можат да се вратат, бидејќи повеќето луѓе сега ги поврзуваат со ИД.