Русија денес им повтори на луѓето во окупираниот град Херсон да бегаат и на тој начин да си ги спасат животите од очекуваната украинска контраофанзива.
Рускиот министер за образование Сергеј Кравцов во видео обраќање рече дека „ситуацијата е тешка и од витално значење е да се спасат животи“.
Руските посредници во јужниот регион се обидуваат да евакуираат до 60.000 луѓе кои живеат на западниот брег на реката Днепар. Сепаратистите денеска во еден момент пријавија недостиг на чамци за транспорт преку реката поради „порастот на бројот на луѓе кои сакаат да го напуштат градот“.
Регионот Херсон се наоѓа северно од полуостровот Крим, кој Русија го анектираше во 2014 година. Тоа е клучна порта за руските воени резерви. Околу 25.000 луѓе се евакуирани од регионот до вторник, го цитира агенцијата Интерфакс заменик-шефот на регионот, Кирил Стремусов.