Терминот за одржување на новата рунда трилатерални преговори за завршување на војната во Украина е поврзан со конфликтот на Блискиот Исток, изјави Јуриј Ушаков, советник за надворешна политика на Кремљ, доведувајќи во прашање дали разговорите ќе се одржат следниот месец, како што првично беше предложено.
Ушаков, според руските новински агенции, изјави дека Москва сè уште не предложила конкретен датум за преговорите. Украинскиот претседател Володимир Зеленски во средата изјави дека се надева оти средбата ќе се одржи во Абу Даби меѓу 6 и 10 ноември.
„Тоа ќе зависи и од ситуацијата на фронтот и од општите околности. Видете каква е моменталната ситуација на Блискиот Исток. Таа едноставно не дозволува средбата да се одржи во блиска иднина. Тоа е барем мојата претпоставка“, им рече Ушаков на новинарите во средата, алудирајќи на регионалните последици од конфликтот во кој се вклучени САД, Израел и Иран.
Ушаков наведе и дека не се разговарало за учество на европски преговарачи во следната рунда разговори.
Лидерите на Велика Британија, Германија и Франција минатиот викенд изјавија дека Европа ќе има улога во преговорите со посредство на САД меѓу рускиот претседател Владимир Путин и Зеленски, чија цел е постигнување прекин на огнот.
„За тоа воопшто не станува збор, за тоа дури и не се размислува“, изјави Ушаков, додавајќи дека во моментов постои само договор за продолжување на трилатералните консултации во кои учествуваат претставници на Русија, Украина и САД.
САД ги предводат напорите за започнување преговори за изнаоѓање решение за војната во Украина, која трае веќе четири и пол години. Европските земји, кои се меѓу најблиските сојузници на Украина и нејзини најголеми воени поддржувачи, досега во голема мера останаа настрана од преговарачкиот процес.
Ушаков во текот на викендот изјави дека Европа треба да биде вклучена во разговорите бидејќи нејзиниот став може да биде клучен.
Во изјавите дадени во средата, тој рече дека за можното учество на европските земји во преговорите не се разговарало ниту за време на телефонскиот разговор што Путин во вторникот го имал со финскиот претседател Александер Стуб и норвешкиот премиер Јонас Гар Стере.