Првите разговори меѓу Русија и Украина по речиси три години што се одржаа во петокот во Турција не беа целосно губење време, на пример, има 1.000 затвореници кои ќе бидат разменети, што е многу позитивно од хуманитарна перспектива, изјави американскиот државен секретар Марко Рубио.
Како што рече Рубио во интервју за Си-Би-Ес, рускиот претседател Владимир Путин му објасни дека ќе подготви документ во кој ќе ги наведе нивните барања за прекин на огнот, што потоа треба да доведе до пошироки преговори.
„Значи, очигледно е дека украинската страна исто така ќе работи на својот предлог и се надеваме дека тој наскоро ќе биде готов“, рече Рубио.
Тој рече дека од една страна, „се обидуваме да постигнеме мир и да ставиме крај на многу крвава, скапа и разорна војна, па затоа е неопходна одредена доза на трпение, додека од друга страна, немаме време за губење“.
Како што нагласи тој, САД не сакаат да бидат дел од процес што е сведен на бесконечни разговори, туку мора да има одреден напредок, некое движење напред.
„На крајот на краиштата, едно од нештата што би можело да помогне во надминување на овој ќорсокак, а можеби и единствено, е директен разговор меѓу претседателот на Соединетите Американски Држави, Доналд Трамп, и Владимир Путин.“
„Трамп веќе отворено ја изрази својата желба и верување дека овој разговор мора да се случи и се надеваме дека тоа ќе се случи наскоро“, рече Рубио. Според него, организирањето на ваков состанок бара одредени подготовки. Кога станува збор за војната во Газа, Рубио рече дека САД се посветени на уништување на Хамас, пренесува Танјуг.
„Ние ја поддржуваме иднината на народот во Газа која е ослободена од Хамас и полна со можности. Тоа е она што го поддржуваме. И ова е групата која на 7 октомври (2023 година) изврши една од најгрозоморните серии напади, киднапирања, силувања, убиства и земања заложници што некогаш сме ги виделе“, рече тој.