Русија потврдува дека ќе ги почитува своите обврски од договорот за иранската нуклеарна програма, изјави денеска во Москва рускиот заменик министер за надворешни работи Сергеј Рјабков.
Во обраќање на собирот по повод 25-годишнината од склучувањето на руско-иранскиот договор за соработка во сферата на користењето на атомската енергија во мирновременски цели, Рјабков нагласи дека Москва се залага за целосно почитување на нуклеарниот договор со Техеран и за воспоставување на нормални услови за трговско-економска соработка меѓу Русија и Иран.
Покрај претставници на Русија и Иран, на собирот се поканети и делегации на останатите пет земји потписнички на договорот за иранската нуклеарна програма – Велика Британија, Германија, Кина, САД и Франција.