Рускиот заменик-министер за надворешни работи Сергеј Рјабков изјави дека неодамнешните украински напади врз руските аеродроми не предизвикале значителна штета на нуклеарниот потенцијал на земјата и дека стратешкиот капацитет за одвраќање кон Соединетите Американски Држави останал непроменет.
„Американскиот, како и рускиот, нуклеарен потенцијал за одвраќање не претрпел никаква значителна штета. Размерот на последиците од овој напад од страна на Киев намерно се преувеличува“, изјави Рјабков за новинарите во Сочи, објави Интерфакс.
Тој објасни дека дел од оштетената опрема веќе бил закажан за поправка и не бил целосно поврзан со платформите опфатени со Договорот за стратешко намалување на оружјето (СТАРТ), кој останува референтна рамка во областа на контролата на оружјето – иако Русија го суспендираше своето учество.
„Одредени системи можат да се класифицираат како дел од стратешката авијација, но други не спаѓаат под дефиницијата за тешки бомбардери според СТАРТ“, рече Рјабков.
Тој посебно нагласи дека нападите не се само израз на „неодговорно однесување на криминалниот режим во Киев“, туку и манифестација на презир кон земјите што ја поддржуваат Украина, вклучително и оние што, според него, имаат капацитети да вршат извидување и да пренесуваат информации во реално време.
„Овие држави свесно го тестираа нашето трпение и ги поткопаа самите темели на концептот на нуклеарно одвраќање – не само со тоа што му попуштија на режимот во Киев, туку и со тоа што му снабдуваа чувствителни воени информации“, рече Рјабков.
Тој нагласи дека недостатокот на одговор од Вашингтон и Лондон на руските барања за запирање на оваа практика е „признание за нивна вмешаност“.
„Ваквите потези, иако во моментов не доведоа до директна ескалација, хипотетички би можеле да доведат до сериозна конфронтација меѓу нуклеарните сили ако продолжат“, предупреди Рјабков, пренесува Танјуг.