Спасувачите се обидуваат да го пронајдат исчезнатиот австралиски рибар, за кој се стравува дека бил фатен од крокодил, одвлечен во реката и проголтан, објави „Дејли мејл“, а пренесува Танјуг.
Еден човек ловел риба на брегот на реката Кенеди на крајниот север на австралиската држава Квинсленд во петокот околу 17.30 часот, кога околните кампери слушнале врисок од правец на реката. Полицијата и спасувачките служби започнаа масовна потрага, користејќи спасувачки хеликоптер кој пристигна од далечина од 400 километри.
Властите ја пребаруваат и областа каде тој ловел риба, но велат дека нема траги од исчезнатиот риболовец. Потрагата ќе продолжи вечерва, а утре наутро ќе се приклучат и државните спасувачки служби.
Пред три недели, крокодил нападна маж во Куктаун, исто така во северен Квинсленд. Крокодилот се закачил за 36-годишен маж, кој успеал да побегне.