Рекордно наддавање, како според количеството на продадената слонова коска и платената цена за неа на јавната лицитација во Кан на југот од Франција, јавува дописникот на МИА од Париз.
Јавната лицитација беше организирана вчера од специјализираната куќа „Кан аншер“, при што на продажба биле ставени трофеји од слонови убиени пред 1976 година, чија продажба е легална.
– Вкупно беа продадени 910 килограми на слонова коска за 625 000 евра, тоа е светски рекорд за една приватна продажба, изјави Александар Дебуси директорот на „Кан аншер“.
Најголемиот број од купувачите биле од Кина, кои зделката ја склучиле телефонски. Најголемата зделка била 73 килограми слонова коска, продадени за 64000 евра.
Во моментов е забрането ловењето на слоновите, како и продажбата на слонова коска на слонови убиени по 1976 година. Неодамна повеќе држави одлучија да ги уништат своите резерви на слонова коска за да ги избегнат шпекулациите на пазарот.