Американски официјални лица и политичари најостро го осудија масовното убиство во геј клуб во Орландо на Флорида во кое загинаа 50 и ранети се 53 лица.
Претседателот на САД Барак Обама го нарече тој масакр терористички чин и порача дека Америка нема да се препушти на стравот.
– САД ќе бидат обединети во заштита на Американците против оние кои и се закануваат на државата, нагласува Обама во обраќање.
Најизвесниот демократски кандидат за изборите во САД, Хилари Клинтон изјави дека нападот во Орландо е акт на тероризам што покажува дека е потребно нацијата двојно да ги зголеми напорите за да се спречат слични напади.
Водечкиот републикански кандидат Доналд Трамп изјави дека се моли за сите жртви и нивните семејства.
Рускиот претседател Владимир Путин изрази сочувство до Обама и сите Американци поради трагедијата во Орландо. Путин во телеграма наведува дека Русија“ дели болка и тага со оние кои загубија блиски и сакани поради тој варварски криминален чин“.
Папата Франциско истакна дека е фрапиран од неразумната омраза. Како што соопшти Ватикан, Папата е „фрапиран пред таа беслислена омраза и лудило“.
Францускиот претседател Франсоа Оланд наведе дека го осудува „хоророт“. – Изразувам целосна поддршка од Франција и Французите за САД и нејзините граѓани во овој тежок период“, нагласува Оланд.
Канадскиот премиер Џастин Трудо рече дека е длабоко шокиран и ожалостен поради се што се случило.
– Солидарни сме со Орландо и со ЛГБТ заедницата. Жалиме за нашите пријатели во САД и на Флорида и нудиме помош, наведува Трудо.
Германскиот претседател Јоаким Гаук во порака на сочувство до Обама пишува: – Ви посакувам сила и одлучност вашата држава да може обединета да се соочи со тагата и болката поради тој напад.
Италијанскиот премиер Матео Ренци напиша на Твитер – Нашето срце е со нашите американски браќа.
Ашраф Гани, претседател на Авганистан го осуди нападот во Орландо, и додаде дека „ништо не може да се оправда убивањето цивили“.
Израелскиот премиер Бенјамин Нетанјаху соопшти дека „изразува најдлабоко сочувство до американскиот народ по нападот врз ЛГБТ популацијата во Орландо“.