Британските министри од редовите на либералдемократската партија, во коалиционата влада на Дејвид Камерон, побараа повлекување и забрана на рекламната кампања против илегалната имиграција во Велика Британија.
Незадоволството на либерелдемократите избувна откако нивните гласачи и партиските членови ги обвинија министрите од оваа партија за неуспехот да ги спречат ториевците, да не се почне со кампањата.
Гневот нарасна кога и лидерот на британската парија на независноста УКИП, Најџел Фараж, познат по својата политика против странските имигранти, јавно ја осуди кампањата, нарекувјќи ја „грда и непријатна“.
Кампањата почна на почетокот од оваа недела, кога во разни реони од Лондон и земјата беа поставени големи билборди, на кои на илегалните имигранти им се порачува -„Одете си дома, или ќе бидете уапсени“.
Министрите либералдемократи бараат веднаш да се прекине со кампањата, инсистирајќи дека таа не е владина, ниту коалициона, туку дека е само на конзервативната партија, која на овој начин настојува со „тврда“ внатрешна политика, посебно во секторот на имиграцијата и во односите со ЕУ, да го спречи одливот на ториевските гласачи кон УКИП.
Претставник на британската либералдемократска партија изјави дека партијата и самата се залага да се стави ред во британската имиграциона политика, но ваквата кампања е „несоодветна, невкусна и неефикасна“.
Функционери на муслиманската заедница во Велика Британија ја осудија кампањата, означувајќи ја како „чист расизам“.