Рускиот претседател Владимир Путин им се обрати на војниците кои се борат во Украина по повод Денот на националната гарда и им рече дека „борбата вклучува зголемен ризик“, пренесува руската државна новинска агенција ТАСС.
– Ви го честитам Денот на руската национална гарда. Националната гарда, која беше основана пред шест години, стана незаменлив и сигурен дел од државниот систем кој обезбедува владеење на правото и спроведување на законот и ги штити правата и интересите на нашите граѓани, рече Путин.
– Би сакал посебно да се обратам до персоналот на Националната гарда вклучен во специјалната воена операција во Донбас и Украина. Другари, борбените услови вклучуваат зголемен ризик, рече рускиот претседател.
– Свесен сум како се држите во оваа ситуација: исклучително храбри и професионални, стручни и бестрашни, компетентно и прецизно ги исполнувате најсложените задачи, а во исто време покажувате херојство, рече Путин.
– Целата наша земја со право се гордее со секој од вас. Сакам да ви се заблагодарам за вашата издржливост и беспрекорна служба за Русија, за вашата лојалност кон вашата татковина, за вашата заклетва на верност. Ви посакувам вам и на вашите семејства добро здравје, успех и среќа, додаде тој.
Извор: МИА