Претседателот на каталонската регионална Влада, Карлес Пуцдемон денеска изјави дека не планира „трауматична“ разделба со Шпанија, откако вчера во Каталонија беше одржан референдум за независност, што Мадрид го смета за нелегален.
– Не сакаме трауматична разделба. Сакаме разбирање со шпанската Влада, нагласи Пуџдемон.
Тој наведе дека досега не остварил конктакт со шпанската Влада.
Пуџдемон оцени дека резултатите од референдумот се „обврзувачки“, повикувајќи на „меѓународно посредување во решавање на кризата со Мадрид“.
Каталонскиот лидер најави и формирање на специјална комисија што би требало да ги испита обвинувањата за кршење на основните човекови права и најави покренување на правна постапка за „одговорните за насилството“.
Тој посочи дека досега 73 Каталонци поднеле официјални тужби против шпанската национална полиција.
– Тоа беше ден кога го доживеавме најголемото неоправдано насилство во последните 40 години. Не само што тоа повеќе не смее да се повтори, туку и не смее да остане неказнето, потенцираше Пуџдемон.
Речиси 850 лица беа повредени вчера во судирите до кои дојде при обидите на шпанската национална полиција да ги затвори гласачките места за референдумот за независност на Каталонија.