Илјадници лица излегоа на нови протести на улиците ширум Египет, откако високиот претставник на ЕУ за надворешна политика и безбедност Кетрин Ештон повика за ослободување на сменетиот претседател Мохамед Морси.
– Мислам дека тој треба да биде ослободен, изјави Ештон, по средбата со времениот претседател Адли Мансур и потпретседателот Мохамед ел Барадеј.
Засега нема информации дали Ештон побарала само ослободување на Морси или и негово враќање на функцијата.
Ештон се сретна и со лидери на Муслиманско братство и апелираше на дијалог меѓу двете страни во спорот.
Таа со претставници на преодната Влада ја разгледала и можноста ЕУ да укаже помош при одржувањето на изборите, вклучително и набљудување на изборниот процес.
Повикот за дијалог, меѓутоа, беше пресретнат со протести во Каиро, како од приврзаници, така и од противници на Морси.