Комунистичките партии во Индија денеска одржаа протест на кој биле запалени кукли со ликот на американскиот претседател Барак Обама пред неговата посета на Њу Делхи.
Околу 100 демонстранти за време на протестниот марш во Њу Делхи извикувале „Барак Обама, тргни ги рацете од Индија“.
Еден од демонстрантите изјавил дека посетата на Обама на Индија, која почнува утре, е насочена кон создавање воена алијанса со Њу Делхи, иако Вашингтон зборува за јакнење на политичките и економски врски.
Водечката Комунистичка партија на Индија и Комунистичката партија на Индија (Марксисти) остро се спротивставуваат на цивилната нуклеарна трговија меѓу двете држави, потпишана во 2008 година.
Обама утре ќе допатува во тридневна посета на Индија, каде ќе оствари средба со премиерот Нарендра Моди, а в понеделник ќе учествува на парадата по повод Денот на републиката.