Натамошно проширување на Европската унија поддржуваат 36 проценти од нејзините жители, 53 се против, а 11 отсто немаат став за ова прашање, покажува истражувањето Евробарометар спроведено во мај годинава по барање на Европската комисија.
Најголеми поддржувачи на проширувањето меѓу земјите членки на ЕУ се Полјаците со 62 отсто, Романците и Летонците 58 отсто, Словенците и Бугарите 56, Унгарците 54 и Швеѓаните 51 отсто.
Најголеми противници за приемот на нови членки, пак, се Германците (74%), Австријците (73%), Финците (71%), Французите (70%), граѓаните на Луксембург (66%), Холанѓаните (62%) и Британците (60%).
Меѓу земјите кандидати или аспиранти за членство, проширувањето на ЕУ најголема поддршка има во Македонија (88%), во Хрватска (65%), Црна Гора (62%) и Србија (58%), а најмала во Исланд (41) и во Турција (40%).