Немирите во Египет продолжуваат и денеска, откако движењето „Муслиманско братство“ ги повика своите приврзаници да излезат на нови протести во Каиро, поради одлуката на египетските судски власти да го продолжат притворот на соборениот претседател Морси за уште 30 денови.
Стотици приврзаници на Муслиманско братство денеска упаднаа и ja запалија зградата на гувернерот на покраината Гиза во Каиро, објави Eгипетската телевизија. Според медиумот, опожарен е влезот на објектот.
Исламистичкиот претседател беше уапсен на 3 јули од страна на армијата. Тој се наоѓа на непозната локација под обвинение за убиства и шпионирање. Египетските судски власти го продолжија денеска притворот на соборениот претседател Морси за уште 30 денови.
Египетските власти, исто така, денеска предадоа 84 лица од градот Суец, меѓу кои и членови и поддржувачи на движењето Муслимански браќа, во надлежност на военото обвинителство поради обвиненија за убиства и палење на цркви.
Станува збор за акција до која дојде ден откако државата прогласи вонредна состојба по насилствата низ земјата меѓу безбедносните сили и членови и симпатизери на Муслиманските браќа во кои загинаа над 460 лица.
Билансот на загинатите во вчерашните судири во Египет достигна 525 лица, изјави портпаролот на египетското Министерство за здравство, Халед ал Хатиб. Бројот на ранетите лица исто така се зголеми и достигна 3.717 лица, додаде Хатиб.
Бројот на жртвите во вчерашните судири се разликува во зависност од изворот, па така „Муслиманско братство“ тврди дека погинале 2.200 лица, а повеќе од 10.000 се ранети.
Од вчера во Египет во сила е вонредна состојба, откако двата протестни кампови во Каиро беа целосно уништени, додека полицискиот час е во сила од 19 до 6 часот наутро по локално време.
Двата протестни кампови во Каиро сега се под контрола на полицијата, од кои еден беше расчистен за еден час по стапувањето во сила на полицискиот час, што е воведен во поголемите градови, меѓу кои се Каиро, Александрија и Суец.