Шефот на приватната паравоена организација „Вагнер“ Евгениј Пригожин денеска уште еднаш апелираше до руското Министерство за одбрана да ги зголеми пратките со муниција до луѓето кои се борат да го заземат градот Бахмут во источна Украина.
Во видеото што го објави на својот канал Телеграм, Пригожин посочи дека за борбените операции се потребни најмалку 300 тони артилериска муниција секој ден, објави Ројтерс.
„Триста тони дневно се 10 товарни контејнери и тоа не е многу. Но, околу една третина од оваа количина е испратена кај нас“, рече Пригожин додека ги прегледуваше сандаците со пешадиско оружје во магацинот, за кој рече дека се наоѓа североисточно од Бахмут, во градот Соледар.
Според него, денеска е годишнина од основањето на „Вагнер“ и ако на групата и е судено да исчезне, тоа нема да се случи благодарение на украинската армија или НАТО, туку поради „нашите домашни бирократски копилиња“.
Пригожин се судри со официјална Москва, обвинувајќи го воениот естаблишмент дека им дава недоволна поддршка на борците „вагнер“ во борбените операции, потсетува Ројтерс.
Бахмут, кој имаше повеќе од 70.000 жители пред избувнувањето на конфликтот, беше речиси срамнет со земја по неколкумесечно гранатирање, ракетни истрели и урбани борби меѓу руските и украинските војници.