Претседателот на украинскиот Парламент, Володимир Литвин денеска поднесе оставка. Врховната рада сега треба да одлучи дали ќе ја прифати неговата оставка.
Според украинските медиуми Литвин одлучил да се повлече од функцијата откако вчера Парламентот, спротивно на правилникот, изгласа закон со кој рускиот јазик добива статут на регионален јазик во 13 од вкупно 27 области во Украина.
Украинскиот и понатаму е единствен официјален јазик, но се прошируваат јазичните права на националните малцинства. Ако законот стапи во сила, рускиот ќе стане регионален јазик во 13 области.
Пред гласањето Литвин ја напушти салата, а процедурата беше раководена од неговиот прв заменик Адам Маринјук.
Литвин, лидер на центристичката Народна партија е претседател на Врховната рада од 2008 година, но тој и во периодот од 2002 до 2006 година ја имаше истата функција.