Јужнокорејскиот претседател Јун Сук Јеол ќе ги прекине неформалните прес-брифинзи што ги одржува речиси секојдневно откако ја презеде функцијата во мај, соопшти денеска неговиот кабинет.
Како што се наведува, зголемениот број заразени со коронавирусот е една од причините за ваквата одлука.
Прекинот на брифинзите доаѓа во време на се почести прашања за скандали и партиски превирања, коментираат светските медиуми.
Истражувањето на агенцијата Рилметерс (Realmeters) покажа дека рејтингот на јужнокорејскиот претседател денес е 37 отсто, што е значителен пад од повеќе од 52 отсто во првата недела од јуни, додека 57 отсто од луѓето сега не ја одобруваат неговата работа.
Кабинетот на Јун во соопштението наведе дека и другите известувања за претседателот исто така ќе бидат ограничени, и оти портпаролите ќе пишуваат коментари, заедно со фотографии и видеа од неговите настани, наместо да одржуваат брифинзи.
Извор: МИА