Претседателот на африканската држава Буркина Фасо, Блез Компаоре денеска прогласи вонредна состојба и вети преговори со опозицијата, откако демонстранти влегоа во Парламентот и го запалија непосредно пред гласањето на предлог-законот, со кој на шефот на државата, по 27 години на власт, му се дозволува повторно да се кандидира на изборите.
– Прогласена е вонредна состојба во целата земја. Командантот на вооружените сили е одговорен за спроведување на оваа одлука, која веднаш стапува во сила, објави локалното „Радио Омега ФМ“.
Претходно беше соопштено и дека претседателот денеска ја распуштил Владата, со цел да се обезбедат услови за промена.
– Барам од лидерите на опозицијата да ги прекинат протестите. Ветувам дека од денеска ќе бидеме отворени за разговор со сите актери за да се стави крај на кризата, се наведува во соопштението.
Претходно, илјадници демонстранти излегоа на улиците на главниот град на Буркина Фасо.