Во Прага денеска почнува дводневниот самит на претседатели на Вишеградската група (В4) (Чешка, Словачка, Полска и Унгарија) и Словенија и Австрија.
Како што јави дописникот на МИА од Прага, главна тема ќе биде развојот на транспортната инфраструктура во Централна Европа и изготвување заедничка стратегија за преговори со Европската Унија за изградба на нови логистички мрежи по 2020 година.
– Транспортот има најголем економски мултипликаторен ефект и тема на состанокот ќе биде сообраќајната мрежа, транспортната логистика и тоа во железничкиот, воздушниот, патниот сообраќај, но исто така и автопатишта, нафтоводи, гасоводи. Едноставно, испорака од суровини преку луѓе до информации, изјави Хинек Кмоничек од Кабинетот на претседателот на Чешка, Милош Земан.
Тој, информираше дека Земан, со своите колеги од Словачка, Унгарија, Полска, Словенија и Австрија, ќе разговара за проектот на каналот Дунав-Одра-Елба.
Финалниот документ од Самитот ќе ја рефлектира визијата на претседателите за транспортната инфраструктура во Централна Европа по 2020 година.