Се очекува Египет наскоро да го отвори граничниот премин Рафах во јужна Газа на неколку часа за странски државјани и жители на Газа кои имаат двојно државјанство.
Ова ќе значи бегство од војната за ограничен број Палестинци. Но, повеќето од 2,3 милиони жители на Газа ќе останат заробени во енклавата разурната од војна.
Рафа е единствениот граничен премин од Газа кон остатокот од светот кој не е директно под контрола на Израел. Тој е контролиран од Египет како дел од договорот со Израел и Европската унија.
Сепак, тоа никогаш не беше нормален, целосно отворен граничен премин. Со текот на годините беше затворен со денови, недели и месеци. Кога ќе се отвори, често е наизменично и може наеднаш повторно да се затвори.
Жителите на Газа никогаш не знаат кога ќе се отвори, па затоа е невозможно нешто да планираат, пишува Sky News.
Ако сте заглавени надвор од Газа кога Рафах се затвора, нема шанси да се вратите повторно. Дури и под најдобри услови, транзицијата е несигурна и нестабилна, благо кажано – хаотична, додава британскиот дописник од Газа.
Египет цврсто го контролира преминот Рафах, а Палестинците го обвинуваат за соучество во опсадата на Газа бидејќи одбива да ја држи границата трајно отворена 24 часа на ден.
Нема поттик за Египет сега да го отвори овој премин и да дозволи стотици илјади жители на Газа да избегаат од војната.
Кога би го отворил, жителите на Газа би станале проблем на Египет, а тоа е последното нешто што Каиро го сака, заклучува дописникот на Скај.