Седум лица загинаа, а 27 се повредени во денешните судири на авганистанско-пакистанската граница. Во судирите загинаа шест пакистански цивили, а 17 се ранети.
На другата страна, еден авганистански војник загина при прекугранично гранатирање и пукање, а десет лица беа повредени, од кои тројца цивили.
Пакистан соопшти дека авганистанските гранични сили, иако не биле испровоцирани, отвориле оган врз цивилното население на граничниот премин Чаман, кој ги поврзува западната пакистанска провинција Балучистан и јужната авганистанска провинција Кандахар, користејќи „тешко оружје, вклучително и артилерија и минофрлачи“.
Пакистанскиот премиер Шехбаз Шариф рече дека убиствата на цивили „заслужуваат најостра осуда“ и додаде дека „привремената авганистанска влада мора да се погрижи такви инциденти да не се повторат“.
Портпаролот на гувернерот на провинцијата Кандахар во Авганистан, Хафиз Сабер, пак, тврди дека конфликтот почнал кога пакистанските сили се обиделе да спречат изградба на нов контролен пункт на авганистанската страна на границата.
Извор: МИА