Повеќе од 29 илјади мигранти загинале обидувајќи се да стигнат до Европа од 2014 година, а пет илјади исчезнале само изминатите две години, соопшти денеска Меѓународната организација за миграција (ИОМ).
Агенцијата на ОН во денешниот извештај предупредува на „зголемен број смртни случаи на рутите во Средоземното Море и на копнените граници кон Европа и во рамките на континентот“.
Според извештајот, најсмртоносната миграциска рута останува централниот дел на Средоземното Море каде од јануари 2021 година загинале 2.836 мигранти и бегалци. Тие се обидуваа да стигнат до Италија или Малта, а преку морето тргнуваа најчесто од Либија и од Тунис.
Втората според бројот смртни случаи е рутата преку Атлантскиот Океан од Западна Африка до шпанските Канарски Острови, каде од 2021 година се регистрирани повеќе од 1.500 загинати.
Истражувачите признаваат дека бројот смртни случаи е веројатно поголем од наведеното.
Извор: МИА