Најмалку 22 лица се повредени во експлозија што се случи во индустриска зона во градот Езеиза, јужно предградие на Буенос Аирес, и предизвика голем пожар, соопштија властите.
Градоначалникот на Езеиза, Гастон Гранадос, изјави за каналот C5N дека „експлозиите и пожарот што гори во неколку згради се ужасни“, објави „Ле Фигаро“.
Причината за експлозијата сè уште не е позната, рече Гранадос, додавајќи дека пожарникарите се обидуваат да го локализираат пожарот, но сè уште не успеале.
Телевизиските снимки покажаа чад и дел од самата експлозија. Директорот на локалната клиника, Карлос Санторо, изјави за „Ла Насион+“ дека 22 повредени лица се примени во болница.
Тој изјави за агенцијата Инфобе дека едно лице е на лекување поради срцев удар, а бремена жена е на интензивна нега поради труење.
Локалните медиуми објавија дека најмалку пет згради се погодени, а индустриската зона се наоѓа во близина на меѓународниот аеродром Езеиза.
Директорот на службата за цивилна заштита на покраината Буенос Аирес, Фабијан Гарсија, изјави за „Ла Насион+“ дека погодената област вклучува компании со различни видови производи, вклучувајќи големи количини гуми, хемиски фабрики и магацин за компанијата „Ајрон Маунтин“. Тој оцени дека станува збор за „многу сложен“ и „голем пожар“.