Велика Британија постигна договор со фукционерите на Европската унија за механизмот за блокирање на законите на ЕУ со кои не се согласува, што беше една од целите на преговорите за редефинирање на односите меѓу Лондон и Унијата, изјавија претставници на кабинетот на британскиот премиер Дејвид Камерон.
Претседателот на Европскиот совет Доналд Туск ќе го објави подоцна денеска нацрт-предлогот за реформи на ЕУ, кои имаат цел да ги задоволат барањата на Британија пред планираниот референдум за останување на земјата во Унијата.
Нацртот, за кој уште треба да се согласат сите земји-членки, меѓу останатото предвидува правно обврзувачка одредба, која овозможува група од 55 отсто или повеќе членки на Унијата да го повлечат законот или да побараат промена.
Камерон вети дека ќе ги реформира односите меѓу Британија и ЕУ и ќе одржи референдум за членство до крајот на 2017 година. Тој се надева дека ќе го финализира договорот за реформите на самитот на ЕУ, кој ќе се одржи на 18 и 19 февруари.