Олег Царјов, поранешен пратеник на Врховната рада на Украина, е ранет и е во тешка состојба, објави денеска Владимир Рогов, шеф на запорожското движење „Ние сме со Русија“.
Тој на Телеграм напиша дека Царјов бил застрелан, дека е во исклучително тешка состојба и дека лекарите прават се што е во нивна моќ да го спасат.
Рогов не кажа каде се случил нападот.
Царјов беше член на Врховната Рада од 2002 до 2014 година од Партијата на регионите и заменик-шеф на таа партија.
Тој се кандидираше за функцијата претседател на Украина на предвремените избори во 2014 година, но подоцна ја повлече својата кандидатура.
Во 2014 година, тој ги поддржа самопрогласените републики во Донбас и стана претседател на парламентот на Новорусија – сојузот на самопрогласените Доњецка и Луганска народна република.
Украинскиот суд го осуди во отсуство за „повредување на територијалниот интегритет“ на земјата и „обид за уривање на уставниот поредок“ на 12 години затвор, а годинава беше обвинет и за велепредавство.