Вооружените сили на Иран „ги држат прстите на чкрапалото“ за „веднаш и енергично да одговорат“ на какви било напади врз земјата, вели иранскиот министер за надворешни работи, Сејед Абас Арагчи.
„Вредните лекции научени од 12-дневната војна ни овозможија да одговориме уште посилно, побрзо и подлабоко“, напиша Арагчи на социјалната мрежа X, според Ал Џезира.
„Во исто време, Иран отсекогаш го поздравувал заемно корисен, фер и праведен нуклеарен договор – на еднаква основа и без принуда, закани и заплашување – што ги обезбедува правата на Иран на мирна нуклеарна технологија и гарантира непоседување нуклеарно оружје“, додаде тој.
Али Шамкани, висок советник на врховниот лидер на Иран, додаде дека ограничениот удар е „илузија“, додека секоја воена акција на САД би се сметала за почеток на војна.
„Секоја воена акција, од САД, од какво било потекло и на кое било ниво, ќе се смета за почеток на војна, а нејзиниот одговор ќе биде непосреден, сеопфатен и без преседан, насочен кон срцето на Тел Авив и сите поддржувачи на агресорот“, напиша Шамкани на социјалната мрежа X.