Серија помали земјотреси се случија во близина на севернокорејски полигон за нуклеарни проби, соопшти денеска Јужна Кореја, што укажува на геолошката нестабилност на областа во време кога Северна Кореја сугерира дека може да продолжи со нуклеарни проби за првпат од 2017 година.
Најмалку четири земјотреси, од кои сите природни, ја погодија областа во последните пет дена, според Корејската метеоролошка агенција (КМА) во Сеул.
Последниот се случил денеска претпладне и бил со јачина од 2,5 степени со епицентар на околу 36 километри од полигонот за нуклеарни проби Пунгје-ри.
Пунгје-ри во североисточна Северна Кореја е единствениот познат полигон за нуклеарни проби. Последната позната проба беше извршена во септември 2017 година кога беше активирана шестата и најголема нуклеарна бомба досега. Пјонгјанг објави дека се работи за термонуклеарна бомба и тврди дека со тоа ја комплетирал својата нуклеарна сила.
Во следните недели, во близина на базата се случија серија земјотреси и лизгање на земјиштето.
Северна Кореја го затвори полигонот во 2018 година пред помала група странски новинари и не им дозвола на меѓународни експерти да го проверат тоа.
Севернокорејскиот лидер Ким Џонг-ун вели дека повеќе не е обврзан да се придржува до самонаметнатиот мораториум на нуклеарни проби, а земјата во јануари соопшти дека размислува да продолжи со тестирање на нуклеарно оружје со долг дострел и балистички ракети затоа што преговорите со САД и сојузниците не напредуваат.
Извор: МИА