Британскиот премиер Дејвид Камерон планираниот референдум за односите на Велика Британија со ЕУ ќе го промовира во Холандија, соопштено е во Лондон.
Претставник на Даунинг стрит 10 изјави синоќа дека говорот околу идните британско-европски односи, што беше очекуван пред Божик и Нова година, ќе биде оддржан на крајот од оваа недела, за време на работната посета на Камерон на Холандија.
Камерон претходно ќе има средба и ќе разговара со својот домаќин, холандскиот премиер Марк Руте, кој, сепак, нема да биде присутен на говорот на својот британски гостин.
Пред претставници на холандскиот бизнис и пред европски дипломати Камерон се очекува да ја брани потребата од еден нов договор на Лондон со Брисел.
Во изјава за радио Би-Би-Си британскиот премиер изјави дека сака нова спогодба со ЕУ за која подоцна ќе побара мислење на Британците, на референдум.
Камерон е подолго време изложен на силен притисок на десницата во неговата Конзервативна партија и на „тачеристите“ меѓу ториевците за враќање на дел од овластувањата што Лондон му ги има префрлено на Брисел.
Евроскептиците во британската владеачка партија заговараат референдум околу тоа дали Велика Британија треба и натаму да остане во ЕУ.
Британскиот премиер инсистира на тоа дека земјата треба да остане во ЕУ, иако го осудува работењето и однесувањето на „бриселската бирократија“.