Пјонгјанг оцени дека САД се обидуваат да ги пролонгираат преговорите за нуклеарната програма на Северна Кореја поради претседателските избори следната година.
Заменикот министер за надворешни работи на Северна Кореја Ри Те Сонг истакна дека се ближи крајот на годината, со што се означува крајот на периодот кој таа земја го одреди за САД, пренесува државната КЦНА. Тој истакна дека целосно зависи од Вашингтон кој божикен подарок ќе го изберат.
– Досегашните чекори на Вашингтон не се ништо друго освен будалест трик осмислен за да ја задржи Демократска Народна Република Кореја во дијалог, со цел тоа да го искористи за политичката ситуација и изборите во САД, оцени севернокорејскиот заменик министер.
Јужнокорејските медиуми оваа изјава ја оценија како прикриена закана дека Пјонгјанг би можел да го укине мораториумот на нуклеарни проби и тестирања на проектили со долг дострел.
Преговорите запреја по неуспешниот обид на средбата меѓу американскиот претседател Доналд Трамп и севернокорејскиот лидер Ким Џонг-ун во февруари во Виетнам.
Двете страни не успеаја да се договорат за следниот чекор кон ублажување на тензиите и Северна Кореја оттогаш лансираше повеќе проектили со кус дострел во море.