Пет лица се убиени, а 132 повредени денеска во нови судири на ирачките безбедносни сили и демонстрантите низ целата земја, со што се зголеми бројот на загинати во протестите од вчера на најмалку седум.
Во јужниот ирачки град Насирија се случи размена на оган откако беа распоредени елитните антитерористички единици откако полицијата „изгуби контрола“ на ситуацијата.
Протестите, кои започнаа вчера поради невработеност, тешка економска состојба и недостиг на основни услуги како што се електрична енергија и вода, денеска ескалираа.
Многу демонстранти извикуваа „пад на режимот“, слоган користен во 2011 година за време на Арапската пролет.
Портпаролот на Министерството за внатрешни работи изјави дека едно дете е убиено кога демонстрант во југоисточниот дел на Багдад фрлил молотов коктел кон возило во кое имало цивили.
Во јужниот град Насирија демонстрант беше убиен кога полицијата отвори оган да ја растера толпата, додека друг починал од здобиени повреди.
Полицијата и војската отворија оган и употребија солзавец за да растераат стотици демонстранти низ Багдад.