Норвешкиот Нобелов комитет денеска во Осло ќе ја соопшти одлуката за доделување на годинашната Нобелова награда за мир.
Лани наградата ја доби ЕУ, а овојпат како еден од најактуелните кандидати во медиумските шпекулации се споменува Организацијата за забрана на хемиско оружје (ОПЦВ), јави дописникот на МИА од Гетеборг.
Доколку се потврди меѓународната организација ОПЦВ, која започна со уништување на хемиското оружје во Сирија, да ја добие Нобеловата награда за мир, одлуката за тоа би била неочекувана, но заднината е мошне актуелна. Работата која е во тек во однос на започнатото уништување на арсеналот хемиско оружје со кое располага Сирија, може да се толкува како мал зрак светлина во сложениот конфликт во таа земја.
Инаку, како кандидати за Нобеловгата награда за мир медиумите во последно време најмногу ја споменуваа 16-годишната Пакистанка Малала Јусафзаи, веќе наградувана за својата борба за правата на девојчињата и жените на образование во Пакистан.