Унгарскиот премиер Виктор Орбан денеска поднесе амандман против какви било идни напори на ЕУ околу разместување на бегалците, кои се однесуваат на правата на секоја земја членка на блокот да се спротивстави на „империјата управувана од Брисел“, јави Танјуг.
Тој на денешното отварање на собраниската расправа за амандманот, истакна дека секоја земја одлучува за својата судбина, додека некои пак, сакаат да го заменат тоа демократско одлучување со „безличен бирократски директорат“.
Крајно десничарската партија „Јобик“ го поддржува амандманот, „оти мултикултурализмот не функционира“, како што велат.
Социјалистите, кои ја претставуваат најголемата левичарска партија, најавија бојкот на гласањето.
Референдумот одржан на 2 октомври во Унгарија, е прогласен за неважечки, поради ниската излезеност, иако 98 отсто од Унгарците кои гласаа се изјаснија против задолжителни квоти за распоредување на имигрантите во земјите од ЕУ.