Опозицијата во Буркина Фасо и разните продемократски групи во оваа западноафриканска земја повикаа денеска на нови масовни протести против армиските сили кои ја презедоа власта по оставката на досегашниот претседател Блез Компаоре.
Лидерите на опозициските партии велат дека бунтот по кој беше соборен Компаоре, по 27 години управување со земјата, е дело на народот на Буркина Фасо, а не на армијата, која сега настојува да го преземе за себе она што се постигна со уличните протести.
Повикот за нови демонстрации доаѓа веднаш откако армијата потврди дека потполковникот Исак Зида, вториот во хиерархијата на командувањето со претседателската гарда, е определен за преоден лидер на земјата. Војската вели дека ваквото решение се однесува само за периодот на транзиција, но не се соопштува колку тоа ќе трае.
Според Уставот на земјата, во случај на оставка на претседателот или смрт, претседателската функција привремено ја презема претседателот на Сенатот. Неговата задача е во периодот меѓу 60 и 90 дена да организира претседателски избори за нов шеф на државата.
Опозицијата стравува дека решението на војската, таа самата да определи воено лице да управува со земјата, по оставката на претседателот, претставува вовед во воен удар.
Во Вагадугу е соопштено дека досегашниот претседател на Буркина Фасо одлетал во соседната држава Брегот на Слоновата Коска.
Војската претходно соопшти дека Блез Компаоре се наоѓа „на безбедно место“, не потенцирајќи дали е во затвор или е во домашен притвор.