Францускиот претседател Франсоа Оланд изјави денеска дека разговорите водени од него и германскиот канцелар Ангела Меркел со рускиот претседател Владимир Путин, се една од последните можности да се избегне војна.
– Мислам дека тоа е една од последните шанси. Ако не успееме да постигнеме траен договор за мир, знаеме какво е сценариото – тоа има само едно име и се нарекува војна, изјави Оланд кој се врати во Франција по разговорите со Путин и Меркел во Москва.
Ангела Меркел вели дека доставувањето оружје нема да помогне за прекин на конфликтот во Украина.
– По разговорите во Москва, не е извесно дали француско-германската иницијатива ќе успее, изјави Меркел во Минхен.
– Сепак, по мое мислење и на францускиот претседател, дефинитивно вреди да се обидеме. Верувам дека толку им должиме на оние кои се загрозени во Украина, додаде таа.
Меркел денеска продолжува нова рунда од дипломатски напори за прекин на конфликтот во Украина.