Во полициска акција против шверцери на бегалци, во која беа вклучени полициите на Шпанија и Албанија и надлежните безбедносни служби на Австрија, Франција, Италија, Словенија, Португалија, Велика Британија, САД, Косово и Европол, уапсени се вкупно 46 лица кои се дел од криминална мрежа што им овозможувала на бегалците илегално да влегуваат во Британија и САД.
„Истрагата, предводена од шпанската полиција со меѓународна полициска поддршка и соработка, резултираше со разбивање на организираната криминална група вклучена во трговија со луѓе и изработка на лажни лични документи и патни исправи“, соопшти Европол.
Како што е наведено, билансот на полициската акција е: 46 уапсени, два претреса во куќи, заплена на фалсификувани лични документи, финансиски документи, електронска опрема, пари и разни наркотици.
Истрагата е започната во 2019 година поради голем број фалсификувани лични документи на бегалци од Западен Балкан.
Акцијата беше координирана од Европол, кој обезбеди размена на доверливи информации и аналитичка и форензичка поддршка.