Управата за цивилно воздухопловство на Русија потврди дека Евгениј Пригожин и командантот на Вагнер Дмитриј Уткин биле во авионот што денеска се урна во руската област Твер. Претходно беше кажано дека сите што биле во авионот загинале.
Во авионот што летал на релација Москва – Санкт Петербург имало седум патници и тројца членови на екипажот. Телеграм каналот „Греј зона“, кој е поврзан со „Вагнер“, објави список на патници во авионот за кои рече дека потекнува од Федералната управа за авијација.
Патниците биле: Евгениј Пригожин, Дмитриј Уткин, Сергеј Пропустин, Евгениј Макаријан, Александар Тотмин, Валери Чекалов и Николај Матусеев. Инаку, Чекалов бил на чело на службата за обезбедување на Вагнер. Членовите на екипажот беа: командантот Алексеј Левшин, копилотот Рустам Каримов и стјуардесата Кристина Распопова.