Седум лица загинаа, а осуммина се повредени во најновите судири во источниот дел на Украина, пред денешните преговори по договореното примирје меѓу Владата и проруските сепаратисти.
Портпаролот на Советот за национална безбедност и одбрана, Андриј Лисенко истакна дека двајца војници се убиени, а тројца се повредени во последните 24 часа, додека шестмина се водат како исчезнати.
При артилериски напади во градовите Доњецк и Макеевка загинале тројца цивили, а други тројца се повредени, тврдат локалните власти.
Едно лице е убиено синоќа во артилериски напад во северна населба на Доњецк, каде борбите околу аеродромот, кој е под контрола на украинските сили, ги зафатија и соседните населени места.
Лисенко изјави дека сепаратистите го прекршиле примирјето откако нападнале позиции на владините сили на најмалку 17 места во последните 24 часа.
И покрај насилството се очекува вечерва претставници на властите во Киев и на бунтовниците да се сретнат повторно на преговори во белорускиот главен град Минск.