Израелскиот премиер Бенјамин Нетанјаху оцени дека трикратното убиство во Еврејскиот музеј во Брисел е резултат на антиеврејските и антиизраелските чувства во Европа.
– Клеветите и лагите против Израел продолжуваат да се слушаат на европско тло како што злосторствата против човештвото и убиствата извршени во нашиот регион систематски се игнорираат, рече Нетанјаху доцна синоќа.
Истиот став го зазеде и израелскиот министер за надворешни работи Авигдор Либерман, кој ги обвини „антиизраелските и антисемитистичките ставови изразени во повиците да се бојкотираат израелските производи“.
Трикратното убиство во Еврејскиот музеј во Брисел длабоко ја потресе Белгија и предизвика силна осуда ширум ЕУ. Полицијата уапси можен извршител, додека по другите се уште се трага.