Израелскиот премиер Бенјамин Нетанјаху денеска им рече на делегатите на Американскиот израелски комитет за односи со јавноста (AIPAC) дека Израел „ќе победи во војната против Хамас без разлика на се“.
Во видео интервју со делегатите собрани во Вашингтон, тој исто така рече дека длабоко ја цени поддршката на американскиот претседател Џозеф Бајден и изрази надеж дека таа ќе продолжи.
„Но, дозволете ми да бидам јасен. Израел ќе победи во оваа војна без разлика на се“, рече израелскиот лидер.
За да се постигне ова, израелската армија (ИДФ) мора да оперира во Рафа, во спротивно Хамас ќе се прегрупира, повторно ќе се вооружи и ќе ја освои Газа, додаде Нетанјаху.
„Тоа е неподнослива закана за нашата иднина и нема да ја прифатиме. Ќе го уништиме Хамас, ќе ги ослободиме нашите заложници и ќе се погрижиме Газа повторно да не претставува закана за Израел“, додаде премиерот на Израел.
Тој вети дека Израел ќе ја заврши работата во Рафа и истовремено ќе дозволи цивилното население да замине од таму.
Нетанјаху ги спомна и другите израелски сојузници, велејќи дека не можат да кажат дека го поддржуваат правото на Израел да се брани, а потоа да се спротивстават на таа држава кога ќе го искористи тоа право.
„Не можете да кажете дека се спротивставувате на стратегијата на Хамас за користење на цивилите како жив штит, а потоа да го обвинувате Израел за цивилните жртви како резултат на стратегијата на Хамас“, рече Нетанјаху.
Тој тврди дека Израел се придржува до стандардот за цивилни жртви до кој ниту една друга земја не се придржува.
Нетанјаху, исто така, рече дека огромното мнозинство од американскиот народ стои со Израел, како и огромното мнозинство од американскиот Конгрес.