Израелскиот премиер Бенјамин Нетанјаху го потсети светот на нападот на палестинското милитантно движење Хамас врз јужен Израел на 7 октомври 2023 година, во своето обраќање пред Генералното собрание на Обединетите нации денес, и ги наведе израелските победи против Хамас, Иран и нивните поддржувачи.
Кога Нетанјаху почна да зборува за Иран, имаше навивање од толпата, а имаше и аплауз како одговор на неговите коментари за војната на Израел со Иран, од 13 до 24 јуни.
Нетанјаху рече дека Израел ги „уништил“ нуклеарните оружја и програмите за балистички ракети на Иран.
Во обраќањето на хебрејски јазик до заложниците на Хамас во Газа, кои можеа да го чујат бидејќи Израелските одбранбени сили (ИДФ) поставија звучници во Појасот Газа за да го емитуваат неговиот говор, Нетанјаху рече дека Израел нема да се смири додека не ги вратат сите дома, објави Ројтерс.
Нетанјаху го повика Хамас веднаш да го положи оружјето и да ги ослободи сите заложници, велејќи дека ќе преживее ако го стори тоа, или милитантната група ќе биде прогонувана од Израел.
Тој ги критикуваше „лажните обвинувања за геноцид“ и рече: „Ако Хамас се согласи со барањата, војната може да заврши“.
Тој исто така рече дека многу лидери кои јавно го осудуваат Израел ѝ се заблагодаруваат на земјата зад затворени врати.
ИДФ потврди дека канцеларијата на премиерот Бенјамин Нетанјаху наредила неговиот говор во ОН да се емитува на Палестинците во Појасот Газа како дел од „кампања за влијание“, објави „Тајмс оф Израел“.
Кабинетот на Нетанјаху соопшти дека ѝ наредил на војската да инсталира звучници на камиони само на израелската страна од границата со Газа, без да ги ризикува животите на војниците, иако израелската војска тврди дека самата донела такви звучници во Појасот Газа.