Во германскиот град Гисен попладнево се случи пукотница, во која се ранети три лица. Инцидентот се случил во обложувалница на главниот градски плоштад кратко по 15:00 часот, соопшти полицијата.
Според првичните информации, непознато лице испукало неколку куршуми во обложувалницата, а потоа уште еден куршум додека бегало во правец на зградата.
Повредените веднаш биле префрлени во болници, но сериозноста на нивните повреди сè уште не е позната.
Околу 20:00 часот, полицијата потврди дека е уапсен еден осомничен, според германските медиуми.
Плоштадот во моментов е затворен за граѓаните, а местото на злосторството е опкружено со полициска лента.
Во тек е собирање траги и форензичка обработка на теренот.
Портпаролката на полицијата изјави дека, врз основа на досегашните информации, нема опасност за населението.
Мотивот за нападот во моментов е непознат, а полицијата наведува дека не може да открие повеќе детали поради истрагата која е во тек.