Најголема вина за потонувањето на луксузниот брод „Коста Конкордија“ е на капетанот Франческо Скетино, но екипажот и сопственикот на бродот се виновни за низа пропусти, одложувања и кршење на безбедносните мерки, се наведува во извештајот на судските вештаци.
Во извештајот на 270 страници за несреќата, во која загинаа 32 лица, вештаците укажуваат на низа проблеми, од спорниот маневар на капетанот, до отежнатата евакуација следена од нејасни упатства за членовите на екипажот, кои не ги разбирале наредбите и не биле обучени за реагирање во кризни ситуации.
Вештаците истакнуваат дека сопственикот на бродот „Коста Конкордија“ го одложувал информирањето на крајбрежната стража за итна реакција, што денеска компанијата го демантираше.
Луксузниот брод „Коста Конкордија“ потона на 13 јануари во близина на брегот на Тоскана, поради скршнување од курсот, при што загинаа 32 лица.
Капетанот Франческо Скетино и уште осум лица се наоѓаат под истрага.